إستمع إلى راديو الأخــبــار المـــغربــيــة

تارودانت بريس
أخبار ساخنة

هاشتاغ "اخنوش ارحل" : المغاربة مرضى والسبب الطالبي العلمي ..راجع نفسك : Dégage_Akhannouch

هيئة التحرير
الصفحة الرئيسية

هاشتاغ "اخنوش ارحل" :   المغاربة مرضى والسبب الطالبي العلمي ..راجع نفسك   :  Dégage_Akhannouch
هاشتاغ "اخنوش ارحل" :   المغاربة مرضى والسبب الطالبي العلمي ..راجع نفسك   :  Dégage_Akhannouch


كتكون جالس مابك ماعليك حتى كتفيق على شي منطيح خارج كيسب فالمغاربة و كيطيح منهم ها لي قالك باغي يعاود ترابي، ها لي قالك مداويخ، ها لي قالت لي كلاب، ها لي قالك مراض واش هاد الناس نساو شكون وصلهم تما ولا كيفاش ؟


على ما كيظهر ليا فالتطاول على الشعب المغربي ونعته بأقبح الصفات كيفتح الشهية للسياسيين خصوصا ديال حزب الاحرار، لي فكل خروج إعلامي ديالهم كيخرج شي عضو فيهم يستفز المغاربة يسبو و يزيد، ضربا بعرض الحائط أن هذوك المغاربة لي كيسبو هما لي صوتو عليهم ووصلوهم للمناصب لي هما فيها، ولاشنو انتما زعما قطعتوا الواد و نشفو رجليكم صافي غير وصلتو الحكومة بديتو تعريو على نيابكم.


داك شي لي بداه كبيركم كتكملوه انتما، ها مرة يخرج لينا بن سعيد يقولك أسيدي حنا مداويخ حيث هضرنا على حقنا وقلنا القدرة الشرائية ديالنا مكتستحملش هاد الزيادات ديالكم، ومن وراه جات منال بنصالح فتدوينة ليها عبر فيسبوك، ردا على الشعب المغربي لي كيتشكى من غلاء الاسعار “بالقافلة تسير و الكلاب تنبح” إنت شادا بلاصتك الأخت مرتاحة مع راسك حساب ليك واش كاع الناس بحالك ولا كيفاش واش مافخباركش بلي داك الخير لي كتمتعوا فيه رزق هاد الشعب المغلوب ؟


واخا نقولو حنا منال بنصالح باقا صغيرة وطايشة و خطواتها ممحسوبينش، إيوا اليوم  أسيادنا، عن طريق رئيس مجلس النواب “ممثل الأمة ” إكتشفنا أننا شعب مريض، سيهم  الطالبي ماحشم على شيباتو ماستحيتي على عرضو ولا على مكانتو، مول العقل وزعما الفقيه لي كنتسناو بركتو، هداك السيد لي دا وجاب  في الايام  وأي حاجة غادي يقولها المفروض أنها تكون محسوبة وشاف التبعيات ديالها فين غادي يوصلوه، غير ماقالو راسو ناض بلا عكز عليه قالك احنا مراض، شنو زعما المغاربة مكيسواو عندو والو غير مرضى صافي ؟


كيستهلوا غير دعاويه معاهم بالشفاء والي صالح انت كتصلي على هيضورة السبع قبح الله سعيك، شكون لي مرض هاد الشعب من غير حزبكم و “حكومة  التشنشيط ” ديالكم، فين وعودكم الكاذبة أ السيهم العلمي ولا حادكين غير فالبلابلا و طاطاشي طاطاشا  كتعطيوا الهضرة عشرة لزيرو نسيتي يامك نهار كنتي طلب فالمغاربة و تواعدهم وتقول ليهم إلا ماوفيناش ضربونا بالحجر ولا كان هذاك غير تبياع العجل للمغاربة أنت والحاشية ديالكم ومن يواليكم و متملقينكم، باش يوصلكوم الحكومة.


علاش هاد الاستفزاز الصريح للمغاربة ؟  فالوقت لي خاصكم تصلحوا الأمور مع الشعب المغربي، و تستاجبو المطالب ديالو خصوصا، من بعد هاد الزيادات لي نازلة بيهم حكومتكم عليه المفروض، أن تفاعلكم أ السيهم الطالبي مع هاشتاغ المغاربة كان خاصو  يكون إيجابي، وتكون فيه دعوة لإعادة النظر فسياسة “التشنشيط “ديالكم، ماشي تسبوا المغاربة و توصفوهم بالمراض واش لي دوا على حقو يتسمى مريض فين باغين توصلوا بهاد الشعب ارباعة الفاشلين ؟


ولا ياكما بغيتي تكمل لي بديتي مع الدولة  بالمغاربة، و تعمر جيبك على ظهرهم وتركعهم، كيفما ركعتي الدولة في مليار و600  مليون سنتيم، ديال ضريبة نورفي كوير لي ماتخلصتش من 1991 ولي رفعتي فيها دعوى  قضائية على المحكمة الإدارية بالرباط، ضد الخازن العام للمملكة نور الدين بنسودة، باش تعفا من أداء الضرائب لي ولات تحت طائلة التقادم المحدد في اربع سنوات، و مانسيناش ليك حتى نهار حركتيها تيلفونات فاش نورفي كوير طاحت فالمزاد العلني، و ماخليتش حتى واحد يقرب جيهتها، شديد أنت زعما ؟ داك التغطرس ديالك بغيتي ديرو حتى مع المغاربة، علاش زعما واش حيث مكينش قانون كينصف حقهم، ويحميهم و يردع اي واحد سولت ليه نفسو يسب المغاربة ويطاول عليهم ؟ وعلى أساس أن أولويات الحكومة هي إنصاف المواطن والحفاظ على كرامتو ولا لاعبين علينا حاميها حراميها ؟


الحصول حنا ماشي كلاب و ماشي مراض خاصنا دعواتكم و ماشي ناقصين ترابي و كل واحد كيهضر بداكشي لي ناقصو والسلام عليكم.


 

google-playkhamsatmostaqltradent